विपिन जोशीको रिहाइको माग गर्दै युवाहरुको प्रदर्शन

काठमाडौं । इसरायलमा जारी युद्धमा प्यालेस्टाइनी विद्रोही समूह हमासको नियन्त्रणमा रहेका नेपालका विपिन जोशीको रिहाइको माग गर्दै युवाहरूले प्रदर्शन गरेका छन् । आइतबार ललितपुरको जावलाखेलमा युवाहरूले उनको रिहाइको माग गर्दै प्रदर्शन गरेका हुन् ।

हमासले नियन्त्रणमा लिएका केही विदेशीहरूलाई रिहा समेत गरिसकेको छ । तर जोशीको रिहाइ नभएपछि युवाहरूले प्रदर्शन गरेका हुन् । उनी सम्पर्कबिहीन भएको तीन महिना बितेको छ । कञ्चनपुरको भीमदत्त नगरपालिका–३ का २३ वर्षीय विपिन सुदूरपश्चिम विश्वविद्यालयको कृषि तथा विज्ञान संकायमा अध्ययनकै क्रममा ‘लर्न एन्ड अर्न’ कार्यक्रमअन्तर्गत भदौमा इसराइल गएका थिए ।

त्यतिबेला विश्वविद्यालयबाट ४९ जना विद्यार्थी इसराइल पुगेका थिए । विपिनलगायत १७ जना एउटै फार्ममा काम गर्थे । असोज २० गते शनिबार हमासको आक्रमणमा उनीहरूमध्ये १० मारिए । हमासले गोली बर्साउन थालेपछि विपिन साथीहरूसँग बंकरभित्र लुकेर बसेका थिए ।