विनोद भण्डारीको कप्तानीमा १६ सदस्यीय नेपाल ‘ए’ टिम घोषणा

काठमाडौँ । नेपाल क्रिकेट संघ क्यानले विनोद भण्डारीको कप्तानीमा १६ सदस्यीय नेपाल ‘ए’ टिम घोषणा गरेको छ । क्यानडासँगको सिरिजका लागि क्यानले नेपाल ए टिम खडा गरेको हो । नेपाल ‘ए’ ले विश्व क्रिकेट लिग–२ को तयारीका लागि नेपाल आइपुगेको क्यानडासँग मैत्रीपूर्ण सिरिज खेल्ने कार्यक्रम छ ।

यसअघि ३६ जना खेलाडीको नाम सार्वजनिक गरेको क्यानले १६ सदस्यीय टिम घोषणा गरेको हो । सिनियर टोलीसम्म पुग्ने बाटोको रुपमा यो नेपाल ‘ए ’ टिम रहेको छ । ‘ए’ टिममा प्रधानमन्त्री कप राष्ट्रिय टोलीमा यस अघि गरेको प्रदर्शनको आधारमा खेलाडी छनोट गरिएको क्यानले जनाएको छ ।

१६ सदस्यीय टोलीमा कप्तान भण्डारीसँगै आशुतोष घिरैया, अर्जुन कुमाल, बसिर अहमद, विवेक यादव, हेमन्त धामी, किरण ठगुन्ना र मयन यादव रहेका छन् । यसैगरी टोलीमा परेका अन्य खेलाडीमा प्रतिश जिसी, रसिद खान, रिजन ढकाल, सागर ढकाल, साहब आलम, सन्दीप जोरा, शेर मल्ल र सुजन थपलिया छन् ।