साफ यू–२० च्याम्पियनसिपमा नेपालको विजयी सुरूवात

काठमाडौं । साफ यू–२० च्याम्पियनसिपमा नेपालले विजयी सुरुवात गरेको छ । दशरथ रंगशालाको मैदान खराब भएपछि सातदोबाटोस्थित एन्फा कम्प्लेक्समा भएको उद्घाटन खेलमा नेपालले जित निकालेको हो ।

आइतबार भएको खेलमा नेपालले श्रीलंकामाथि १–० गोलको जित निकालेको हो । नेपालको जितमा निराजन धामीले गरेको गोल निर्णायक सावित भयो । उनले खेलको २४ मिनेटमा डिबक्स भित्रबाट सशक्त प्रहार गर्दै गोल पोस्टको दिशा दिएका थिए । खेलमा नेपाली फरवार्ड पाएका अवसरमा पटकपटक चुकेका थिए । समिर तामाङले दुई सुन्दर अवसर खेर फालेका थिए । यस्तै अनिल बम्जन पनि प्राप्त अवसरमा सफल हुन सकेनन् । प्रतियोगिताको समूह ‘ए’ मा नेपाल, बंगलादेश र श्रीलंका छन् भने समूह ‘बी’ मा भारत, माल्दिभ्स र भुटान रहेका छन् ।