इरानमा बस दुर्घटनाः २८ पाकिस्तानी तीर्थयात्रीको मृत्यु

काठमाडौं । इरानमा तीर्थयात्री चढेको बस दुर्घटना हुँदा २८ जनाको मृत्यु भएको छ । मंगलबार राति इरानको तेहरानस्थित याज्द सहरमा बस दुर्घटना हुँदा २८ जनाको मृत्यु भएको र अरू २३ जना घाइते भएको बिबिसीले जनाएको छ । बसमा पाकिस्तानी तीर्थयात्री सवार थिए ।

पाकिस्तानी समाचार संस्था डनका अनुसार दुर्घटनामा परी घाइते भएकामध्ये ७ जनाको अवस्था गम्भीर छ । मृत्यु हुनेमा १७ जना महिला र ११ जना पुरूष छन् । चालक र सहचालकसहित ५३ जना रहेको उक्त बस ब्रेक फेल भएर दुर्घटना भएको हो । उनीहरू तीर्थयात्रामा इराक जाँदै थिए ।

पाकिस्तानका राष्ट्रपति आशिफ अली जरदारीले दुर्घटनामा मृत्यु भएकाहरूको शव देशमा ल्याउन र घाइतेहरूको उपचार सुनिश्चित गर्न विदेश मन्त्रीलाई निर्देशन दिएका छन् । प्रधानमंत्री शहबाज़ शरीफले पनि सामाजिक सञ्जाल प्लेटफर्म एक्समा लेख्दै मृतकका परिवारप्रति समवेदना र घाइतेहरूको शीघ्र स्वास्थ्य लाभको कामना गरेका छन् ।