परमादेशको सरकार: चोलेन्द्र शमशेरका आफन्त पनि मन्त्री

परमादेशको सरकार: चोलेन्द्र शमशेरका आफन्त पनि मन्त्री

काठमाडौँ-परमादेशबाट प्रधानमन्त्री बनेका देउवा सरकारले प्रधानन्यायाधीश चोलेन्द्र शमशेर जबराका जेठान गजेन्द्र हमाललाई मन्त्री बनाएको छ ।
प्रधानमन्त्री देउवाले हमाललाई उद्योग, वाणिज्य तथा आपूर्तिमन्त्री बनाउने निर्णय गरेका हुन् ।
प्रधानमन्त्री देउवाको सचिवालयले हमाललाई मन्त्री बनाउने निर्णय भएको पुष्टि गरेको छ ।
यसअघि प्रधानन्यायाधीशले मन्त्रीमा कोटा मागेको भन्दै हमालको नाम चर्चामा आएपछि बार र बेन्चबीच यस विषयमा तनाव समेत भएको थियो ।
सर्वोच्च अदालतले मन्त्रीमा कोटा नमागेको भन्दै विज्ञप्ति समेत जारी गरेको थियो भने प्रधानन्यायाधीश जबराले हमाल काँग्रेसको नेता भएको हुनाले उनी मन्त्री हुनुमा आफ्नो हात नरहने धारणा सर्वोच्च बारसँगको बैठकमा बताएका थिए ।
प्रधानन्यायाधीशले सरकारमा कोटा मागेको आशंकालाई हमालको नियुक्तिले सही सावित गरिदिएको छ ।
गैरसांसद हमाल प्रधानन्यायाधीशका जेठान नाता पर्छन् । उनी नेपाली काँग्रेस बाँकेका नेता हुन् ।
देउवा पत्नी आरजुसँग पनि हमालको पारिवारिक नाता रहेको छ ।

लोकप्रिय