जनप्रतिनिधिका निर्णय : प्राविधिक शिक्षामा छात्रवृत्तिदेखि विपन्नको स्वास्थ्य बीमासम्म

दमौली- स्थानीय तह निर्वाचनबाट निर्वाचित तनहुँका १० वटै पालिकाका जनप्रतिनिधिले पदभार ग्रहण गरेर कामको सुरुआत गरेका छन् । पदभार ग्रहणसँगै जनप्रतिनिधिले सर्वसाधारणका लागि हित हुने खालका निर्णय गरेका छन् ।

भानु नगरपालिकाका नगरप्रमुख आनन्दराज त्रिपाठीले नगरभित्र सञ्चालित विद्यालयमा प्राविधिक शिक्षा अध्ययन गर्ने विपन्न र जेहेन्दार विद्यार्थीलाई छात्रवृत्ति दिने निर्णय गर्नुभएको छ ।

प्रत्येक वडाका एक छात्र र एक छात्रा गरी १३ वडाका २६ विद्यार्थीलाई वार्षिक रु ५० हजारका दरले छात्रवृत्ति प्रदान गरिने त्रिपाठीले बताउनुभयो ।

प्राविधिक शिक्षा आजको आवश्यकता भएकाले विपन्न विद्यार्थीको पठनपाठनमा सहयोग पु¥याउन उक्त निर्णय गरिएको नगरप्रमुख त्रिपाठीले जानकारी दिनुभयो ।

प्रत्येक वडा समितिले एक छात्र र एक छात्रालाई छात्रवृत्तिका लागि सिफारिस गर्ने नगरपालिकाका शिक्षा, युवा तथा खेलकुद शाखा प्रमुख धु्रवराज पौडेलले जानकारी दिनुभयो ।

सो नगरपालिकामा तीन प्राविधिक शिक्षालय सञ्चालित छन् ।

भानु–२ स्थित होमराज लोहनी शारदा शिक्षा सदन मावि, भानु–११ स्थित त्रिभुवन मावि र भानु–४ स्थित भानु संस्कृत माविमा प्राविधिक शिक्षा अध्ययन हुँदै आइरहेको छ ।

यी विद्यालयमा सिभिल इञ्जीनियरिङ, तीनवर्षे कृषि डिप्लोमा र १८ महिने बाली विज्ञान तथा कृषि विषयको टिएसएलसी सञ्चालनमा छन् ।

आँबुखैरेनी गाउँपालिकाका अध्यक्ष शुक्र चुमानले ज्येष्ठ नागरिक, दीर्घरोगीलाई निःशुल्क एम्बुलेन्स सेवा प्रदान गर्ने निर्णय गर्नुभएको छ ।

उहाँले गर्भवती महिला, ६० वर्ष पुगेका ज्येष्ठ नागरिकलाई निःशुल्करूपमा एम्बुलेन्स सेवा उपलब्ध गराउने निर्णय गर्नुभएको हो ।

आकस्मिक बिरामी, दीर्घरोगी, असहाय, अशक्तलाई निःशुल्क एम्बुलेन्स सेवा प्रदान गर्ने निर्णय गरिएको अध्यक्ष चुमानले बताउनुभयो ।

आवश्यक परेको खण्डमा गाउँपालिका अध्यक्षले प्रयोग गर्ने सवारीसाधनलाई समेत बिरामी बोक्नका लागि प्रयोग गरिने उहाँले बताउनुभयो ।

गाउँपालिकासहित सबै वडा कार्यालयलाई सेवामैत्री बनाउन कार्यालयमा सेवा लिन जाने सेवाग्राहीलाई सफा, शुद्ध पानीको व्यवस्था गर्ने, प्रत्येक कार्यालयमा एक कर्मचारीसहितको नागरिक सहायताकक्ष स्थापना गरिने चुमानले जानकारी दिनुभयो ।

चुमानले शिक्षा, स्वास्थ्य, रोजगारी, पर्यटन, सडक तथा पूर्वाधार, कृषि, खेलकुदलगायतका क्षेत्रलाई प्राथमिकतामा राखेर काम गर्ने प्रतिबद्धता व्यक्त गर्नुभएको छ ।

म्याग्दे गाउँपालिकाले घरमा निःशुल्क नम्बर प्लेट राख्ने निर्णय गरेको छ ।

नवनिर्वाचित अध्यक्ष श्रीप्रसाद श्रेष्ठले पदभार ग्रहण गर्दै जीआइएसका आधारमा घर नम्बरिङका लागि निःशुल्क नम्बर प्लेट उपलब्ध गराउने निर्णय गर्नुभएको हो ।

गाउँपालिकाभित्रका घरको विवरण डिजिटल प्रविधिमा रुपान्तरणका लागि घर नक्सा कायम भएका घरलाई एकपटकका लागि नम्बर प्लेट निःशुल्क उपलब्ध गराउने निर्णय गरिएको प्रमुख प्रशासकीय अधिकृत नारायणप्रसाद अधिकारीले जानकारी दिनुभयो ।

यसैगरी उपाध्यक्ष बालकृष्ण घिमिरेले पदभार ग्रहण गर्दै प्रत्येक वडामा मेलमिलाप केन्द्र गठन गर्ने निर्णय गर्नुभएको छ ।

गाउँपालिकाभित्र हुने झैझगडाका घटना वडास्तरमै मिलाउन मेलमिलाप केन्द्र गठन गरिने घिमिरेले बताउनुभयो ।

घिरिङ गाउँपालिकाका अध्यक्ष होमबहादुर थापाले लिफ्ट प्रविधिबाट सञ्चालित खानेपानी योजनाको भुक्तानी गाउँपालिकाले व्यहोर्ने निर्णय गर्नुभएको छ ।

गाउँपालिकाले सञ्चालन गरेको ‘एक घर, एक धारा’ अभियान सफल बनाउन र सर्वसाधारणलाई राहत दिन उक्त निर्णय गरिएको थापाले बताउनुभयो ।

उहाँले खानेपानी, स्वास्थ्य तथा शिक्षालगायतका आधारभूत आवश्यतालाई प्राथमिकतामा राखेर काम गर्ने बताउनुभयो ।

व्यास नगरपालिकाका प्रमुख वैकुण्ठ न्यौपानेले विपन्न नगरवासीको निःशुल्क स्वास्थ्य बीमा गरिदिने निर्णय गर्नुभएको छ ।

सबैलाई स्वास्थ्यको पहुँचमा ल्याउन बीमा गर्न नसक्ने विपन्न नगरवासीलाई निःशुल्क स्वास्थ्य बीमा गरिदिने न्यौपानेले निर्णय गर्नुभएको छ । ऋषिङ गाउँपालिकाका अध्यक्ष राजेन्द्रकृष्ण श्रेष्ठले गत वर्षको अविरल वर्षाका कारण आएको बाढी तथा पहिराबाट क्षति पुगेका घर निर्माण गर्ने निर्णय गर्नुभएको छ ।

त्यस्तै गाउँपालिकाको वडा नं ३ र ४ जोड्ने दिउलीखोलामा पक्की पुल निर्माणका लागि आवश्यक व्यवस्था गर्ने निर्णयसमेत श्रेष्ठले गर्नुभएको छ ।

तनहुँका आठ पालिकामा कार्यपालिकाले पूर्णता पायो तनहुँका १० स्थानीय तहमध्ये आठ स्थानीय तहमा कार्यपालिकाले पूर्णता पाएको छ ।

स्थानीय तह निर्वाचनअन्तर्गत जिल्लाका आठ पालिकामा कार्यपालिकाले पूर्णता पाएको हो । व्यास नगरपालिका र शुक्लागण्डकी नगरपालिकामा कार्यपालिका सदस्य चयन हुन बाँकी छ ।

आज मात्रै भानु नगरपालिकाको कार्यपालिका सदस्य निर्वाचित भएका छन् । कार्यपालिकामा नेपाली कांग्रेसका सात र नेकपा (एकीकृत समाजवादी)का एक जना निर्वाचित भएका छन् ।

स्थानीय तह निर्वाचनमा सत्तारुढ दलबीच गठबन्धन नभए पनि कार्यपालिका सदस्यमा भने एकीकृत समाजवादीले पनि भाग पाएको छ ।

दलित-अल्पसङ्ख्यकतर्फ एकीकृत समाजवादीबाट राजु सुर्खाली कार्यपालिका सदस्यमा निर्वाचित हुनुभएको छ ।

कांग्रेसबाट रविन भुजेल र धनबहादुर विक निर्वाचित हुनुभएको छ । निर्वाचित वडा सदस्यबाट महिलातर्फ वृन्दा रानाभाट, प्रविना थापा, सावित्रा सुनार, सकिना खातुन र शान्ता लम्साल निर्वाचित हुनुभएको छ ।

भिमाद नगरपालिका, देवघाट गाउँपालिका, आँबुखैरेनी गाउँपालिका, बन्दीपुर गाउँपालिका, म्याग्दे गाउँपालिका, ऋषिङ गाउँपालिका, घिरिङ गाउँपालिकामा कार्यपालिकाले पूर्णता पाइसकेको छ ।

कार्यपालिकाले पूर्णता पाएकामध्ये भानु, देवघाट, म्याग्दे, ऋषिङमा कांग्रेसको बहुमत पुगेको छ भने बन्दीपुरमा कांग्रेस र नेकपा (माओवादी केन्द्र)को गठबन्धनको बहुमत पुगेको छ ।

भिमाद र घिरिङमा नेकपा (एमाले)को तथा आँबुखैरेनीमा नेकपा (माओवादी केन्द्र)को एकल बहुमत पुगेको छ ।

व्यास नगरपालिकाको कार्यपालिका चुनावका लागि भने कार्यतालिका प्रकाशित भएको छ ।

मुख्य निर्वाचन अधिकृतको कार्यालयले कार्यपालिका सदस्य निर्वाचनका लागि कार्यतालिका प्रकाशित गरेको हो ।

तालिका अनुसार यही जेठ २१ गते मनोनयन र २५ गते मतदानको कार्यतालिका रहेको छ ।