आजदेखि उपत्यकामा चल्ने सवारी साधनमा जोर बिजोर प्रणाली लागू हुने

काठमाडौ । कोभिड १९ को संक्रमणलाई मध्यनजर गर्दै भीड कम गर्नका लागि उपत्यकामा यातायातमा जोर बिजोर प्रणाली लागू गर्ने निर्णय गरिएको छ । उपत्यकाका प्रमुख जिल्ला अधिकारीहरुले बिहिबार सो निर्णय गरेका हुन् । माघ ७ गते राति १२ बजेबाट यातायातमा जोर बिजोर प्रणाली लागू गर्ने निर्णय गरिएको प्रमुख जिल्ला कार्यालय ललितपुरले जनाएको छ ।
सार्वजनिक र निजी सवारी साधन जोर गते जोर र बिजोर गते बिजोर नम्बरका मात्र चल्न पाउने छन् । सार्वजनिक सवारीका चालक र सहचालकले मास्क र फेस सिल्ड अनिवार्य लगाउनुपर्नेछ । स्वास्थ्य सामग्री बोकेका सवारीसाधन, एम्बुलेन्स, दमकल, शववाहन तथा पेट्रोलियम पदार्थसहित अनिवार्य आवश्यकता पर्ने ढुवानीका सामान बोकेका सवारीलाई भने जोर बिजोर लागू हुने छैन ।