न्युटन इन्टरनेसनल कलेजले जित्यो अन्तर-कलेज फुटसल प्रतियोगिताको उपाधि

काठमाडौं — कोटेश्वर बहुमुखी क्याम्पस स्वतन्त्र विद्यार्थी युनियन (स्ववियु) द्वारा आयोजित अन्तर-कलेज स्तरीय खुला फुटसल प्रतियोगिताको उपाधि न्युटन इन्टरनेसनल कलेज, जोरपाटीले हात पारेको छ।

प्रतियोगिताको फाइनल खेलमा न्युटनले कोटेश्वर बहुमुखी क्याम्पसलाई पराजित गर्दै १ लाख नगद, शिल्ड, मेडल र प्रमाणपत्र जित्न सफल भएको हो। उप-विजेता कोटेश्वर बहुमुखी क्याम्पसले ५० हजार नगद, शिल्ड र प्रमाणपत्र प्राप्त गरेको छ।

यसैगरी, न्युटन कलेजका खेलाडीले सर्वोत्कृष्ट गोलकीपरको पुरस्कार पनि हात पारेका छन्। यस प्रतियोगितामा काठमाडौं उपत्यकाका ४० वटा कलेज/क्याम्पसले सहभागिता जनाएका थिए।

प्रतियोगिता आयोजक समितिले सबै प्रतिस्पर्धी टोलीहरूलाई धन्यवाद ज्ञापन गर्दै खेलकुदले युवाहरूमा एकताको भावना बढाउने विश्वास व्यक्त गरेका छन्।