यी अबाेध बालबालिकालाई अमेरिकाले मिसाइल हानेर मार्‍यो, अमेरिकाकै अखबारले गर्‍यो यस्ताे भयानक खुलासा

काठमाडौं। काबुल विमानस्थलमा सयौंको ज्यान जानेगरी आत्मघाती बम आक्रमण भएपछि अमेरिकाले यसको जवाफमा काबुलमा एयरस्ट्राइक गरेको थियो । अमेरिकाले त्यो एयरस्ट्राइकमा विष्फोटक पदार्थ बोकेर काबुल विमानस्थलतर्फ आइरहेको गाडीलाई ध्वस्त पारेको दावी गरेको थियो । तर, अमेरिकाकै प्रतिष्ठित अखबार न्यूयोर्क टाइम्सले भने अमेरिकाले निशाना बनाएको गाडीले विष्फोटक पदार्थ नभइ खानेपानीका जारहरु बोकेको दावी गरेको छ ।

काबुल विमानस्थलमा भएको आत्मघाती आक्रमणको जिम्मेवारी आइएसआइएस–केले लिएको थियो । त्यसपछि अमेरिकाले २ पटक एयरस्ट्राइक गरेको थियो । यो एयरस्ट्राइकमा आत्मघाती आक्रमणका मुख्य योजनाकार मारिएको अमेरिकाले दावी गरेको थियो । तर, न्यूयोर्क टाइम्सले भने अमेरिकाले जुन ठाउँमा एयरस्ट्राइक गरेको थियो त्यहाँ एक सहायताकर्मी ड्राइभरलाई निशाना बनाइएको दावी गरेको छ । उनले चलाइरहेको कार विष्फोटक पदार्थले नभइ पानीका जारले भरिएको रिपोर्टमा दावी गरिएको छ ।

न्यूयोर्क टाइम्सको जाँच रिपोर्टका अनुसार २९ अगष्टका दिन जतिबेला अमेरिकाले एयरस्ट्राइक गरेको थियो त्यतिबेला ४३ वर्षका जेमारी अहमदी १९९६ मोडलको टोयोटा कोरोला गाडी चलाइरहेका थिए । यो गाडी आक्रमणपछि नष्ट भएको थियो । यो एयरस्ट्राइकमा जेमारी र ७ जना बालबालिकासहित परिवारका ९ जनाको मृत्यु भएको थियो । अमेरिकी रक्षा मन्त्रालय पेन्टागनले भने एयरस्ट्राइकपछि केवल ३ जना सर्वसाधारणको मृत्यु भएको दावी गरेको थियो । तर, न्यूयोर्क टाइम्सले अफगानी परिवारलाई उनीहरुका १० सदस्यको कसरी मृत्यु भयो भन्ने विस्तारमा बताएको छ ।

न्यूयोर्क टाइम्सले अहमदीको कामको बारेमा जानकारहरु, प्रत्यक्षदर्शीहरु, सीसीटिभी फुटेज र निगरानीका आधारमा भिडियो फुटेजसमेत सार्वजनिक गर्दै जुन गाडीलाई एयरस्ट्राइकमा ध्वस्त पारियो त्यसमा पानीबाहेक अरु केही पनि लोड नभएको खुलासा गरेको छ । एयरस्ट्राइकमा मारिएका अहमदीका भाइ इमलले न्यूयोर्क टाइम्ससँग कुरा गर्दै भने ‘मारिएका सबैजना निर्दोष थिए । अहमदीले आफ्नो अन्तर्राष्ट्रिय सहायता कार्यको आधारमा अमेरिकासँग शरणार्थीको दर्जा मागेका थिए । तपाइँ भन्नुहुन्छ कि उनको सम्बनध आइएसआइएससँग छ तर उनले अमेरिकीहरुको लागि काम गरेका थिए ।’

पेन्टागनले भने अझै पनि जोड दिँदै अहमदीका गतिविधिहरुले उनलाई आइएसआइएस–केको एक सुरक्षित अड्डासँग जोडेको र उनको वाहनमा विष्फोटक भएको दावी गर्दै यो विष्फोटकको प्रयोग काबुल एयरपोर्टबाट निकासीको अन्तिम घण्टामा अमेरिकी सैनिकमाथि आक्रमणको लागि गरिएको समेत दावी गरेको छ । अमेरिकी ज्वाइन्ट चीफ अफ स्टाफका अध्यक्ष मार्क ए मिलेले गत हप्ता अहमदी आइएसआइएसका सूत्रधार भएको समेत दावी गरेका थिए । एयरस्ट्राइक गरिएको घरमा अहमदी आफ्ना तीन दाजुभाइ र उनीहरुका परिवारको साथमा बस्थे ।

आक्रमणको केही समयपछि अमेरिकी राष्ट्रपति जो बाइडेनले देशका नाममा सम्बोधन गर्दै ३१ अगष्टको समय सीमासम्म अमेरिकी सैनिक अफगानिस्तानबाट बाहिरिने बताएका थिए । उनले जमिनमा नटेकी आतंकवादी र उनीहरुको अड्डामा आक्रमण गर्न सक्ने अमेरिकी क्षमताबारे पनि बताएका थिए । तर, न्यूयोर्क टाइम्सका अनुसार २९ अगष्टको एयरस्ट्राइकपछि कति सर्वसाधारण मारिए भन्नेबारे जानकारी पाउन राष्ट्रपति बाइडेन विफल रहे । उनले एयरस्ट्राइकमा ७ बालबालिकाको मृत्यु भएको पनि उल्लेख गरेनन् । बाइडेनले भनेका थिए ‘हामीले १३ अमेरिकी सैनिक र दर्जनौं निर्दोष अफगानीहरुको हत्या गर्ने आइएसआइएस–केमाथि आक्रमण गर्यौं जसमा यो षड्यन्त्रका मुख्य योजनाकार पनि मारिए ।’