एमालेका सांसदहरूबाट संसद बहिष्कार

काठमाडौँ । प्रमुख प्रतिपक्षी नेकपा एमालेका सांसदहरूले प्रतिनिधि सभाको बैठक बहिष्कार गरेका छन्। बजेटमाथि अर्थमन्त्री जनार्दन शर्माले जवाफ दिएलगत्तै एमाले प्रमुख सचेतक विशाल भट्टराईले समय मागेर बोलेका थिए।

भट्टराईले अर्थमन्त्रीबारे तीन दिनदेखि एमालेले संसदीय छानबिन गर्नुपर्ने आवाज उठाए पनि जवरजस्ती रूपमा आज बजेटमाथिको छलफलमा भाग लिन दिइएकोमा आपत्ति जनाएका थिए।

‘सभामुखले पनि संसदीय मर्यादालाई सम्मान गर्नुभएन कि भन्ने हामीलाई चिन्ता लागेको छ,’ उनले भने, ‘अर्थमन्त्रीका जवाफ देश र सत्ता तथा प्रतिपक्षलाई सुन्न लायक लागेन। यसपछिका पूर्ववत कार्यक्रममा एमाले सहभागी हुन्छ।’