महसुल नतिर्ने उद्योगलाई प्राधिकरणको अल्टिमेटम !

काठमाडौँ । नेपाल विद्युत् प्राधिकरणले ट्रंकलाइन तथा डेडिकेटेड फिडर महसुल बापतको अतिरिक्त प्रिमियम शुल्क नतिर्ने उद्योगहरूको लाइन काट्ने अल्टिमेटम दिएको छ । प्राधिकरणका अनुसार बक्यौता नतिर्ने उद्योगहरूलाई कात्तिक २ गतेसम्मको अन्तिम म्याद दिइएको छ । तोकिएको समयभित्र बक्यौता नबुझाए सबै उद्योगको विद्युतको लाइन काट्न निर्देशन दिइएको प्राधिकरणले जनाएको छ ।
ऊर्जामन्त्री कुलमान घिसिङले कार्यभार सम्हालेपछि बक्यौता उठाउने निर्णय गरेका थिए । उनकै निर्णयलाई साथ दिँदै कार्यकारी निर्देशक मनोज सिलवाल पनि बक्यौता उठाउन सक्रिय छन् । प्राधिकरणको बोर्ड बैठकबाट पनि ट्रंकलाइन तथा डेडिकेटेड फिडरको महसुल बक्यौता उठाउनुपर्ने निर्णय भइसकेको छ ।